पोंदेवाडी (ता. आंबेगाव) येथे वनविभागाने लावलेल्या पिंजऱ्यात बिबट्या जेरबंद .

मंचर- पोंदेवाडी (ता. आंबेगाव) येथील शेतकरी महेश बबनराव वाळुंज यांच्या घराजवळ वनविभागाने लावलेल्या पिंजऱ्यात बिबट्या अडकला असुन त्यामुळे नागरिकांनी सुटकेचा निःश्वास सोडला.या बिबट्याला वनविभागाच्या अवसरी खुर्द ता.आंबेगाव येथील वनउद्यानात नेण्यात आले आहे.

आंबेगाव तालुक्याच्या पूर्व भागात मोठ्या प्रमाणावर बिबट्यांचा वावर आहे.पोंदेवाडी येथील खारावस्ती येथील शेतकरी महेश बबन वाळुंज यांच्या घराजवळ बिबट्या माघील अनेक दिवसापासून येत होता.याआधी मेंढपाळांच्या मेंढ्यांवर व पाळीव कुत्रे,कालवड यांच्यावर बिबट्या ने अनेकवेळा हल्ला केला होता.काही दिवसापुर्वी तात्याभाऊ बाबुराव वाळुंज यांच्या कालवडीला बिबट्या ने हल्ला करून जखमी केले हि कालवड दोन दिवसांनी मृत्यू झाला.माघील एक महीन्यापासुन खारावस्ती परीसरात हा बिबट्या वावरत होता.त्यामुळे येथील नागरिक भयभीत झाले होते.याठिकाणी पिंजरा लावावा अशी मागणी पोंदेवाडीचे माजी सरपंच बबनराव वाळुंज यांनी केली होती.
त्यानंतर मंचर वनपरीक्षेत्र अधिकारी विकास भोसले, वनपाल निलम चव्हान,वनरक्षक पुजा कांबळे यांनी याठिकाणी पंधरा दिवसांपूर्वी पिंजरा लावला होता.पहिल्यांदा या पिंजऱ्यात कोंबड्या ठेवल्या परंतु बिबट्या पिंजऱ्यात अडकला नाही.
सोमवारी रात्री शेळीच करडु या पिंजऱ्यात ठेवण्यात आले.हे करडु ओरडत असल्याने आवाजाच्या दिशेने आलेला हा बिबट्या आज मंगळवारी पहाटे या पिंजऱ्यात अडकला.सकाळी बिबट्या अडकल्याची माहिती बबनराव वाळुंज यांनी वनरक्षक पुजा कांबळे यांना दिली.कांबळे यांनी अशोक जाधव, विकास खळे अजय तळेकर यांच्या मदतीने बिबट्याला मंचर येथील वनउद्यानात नेले आहे.सदर बिबट्या नर जातीचा असुन चार वर्षे वयाचा असावा असा अंदाज वनविभागाच्या अधिकाऱ्यांनी वर्तवला आहे.

आंबेगाव तालुक्याच्या पूर्व भागात मोठ्या प्रमाणात बिबटे दिसत आहेत.येथे असणाऱ्या उसाच्या शेतामध्ये बिबटे राहत आहेत.अनेक वेळा हे बिबटे घरापर्यंत येत असतात.त्यामुळे अनेक वेळा पाळीव प्राणी कुत्रे यांवर हल्ले होत असतात.त्यामुळे या परिसरातील नागरिकांना बिबट्याच्या भितीखाली राहावे लागत आहे.